સાવધાન! ખેડાની યુવતી સાથે મદદના બહાને છેતરપિંડી: ડોક્યુમેન્ટ મેળવી બારોબાર કરાવી દીધા લગ્ન, હવે મળી રહી છે જાનથી મારી નાખવાની ધમકી
ખેડા: મદદના બહાને વિશ્વાસઘાત અને છેતરપિંડીનો એક ચોંકાવનારો કિસ્સો ખેડા જિલ્લાના હેરંજ ગામેથી સામે આવ્યો છે. અહીં એક યુવકે ટેબલેટ અપાવવાના બહાને યુવતી પાસેથી દસ્તાવેજો મેળવી, તેની જાણ બહાર બોગસ લગ્ન નોંધણી કરાવી દેતા ચકચાર મચી ગઈ છે.
ટેબલેટ અપાવવાનું બહાનું અને છેતરપિંડીની જાળ
ઘટનાની વિગતો મુજબ, હેરંજ ગામની રહેવાસી ક્રિષ્ણા રોહિત નામની યુવતીને તે જ ગામના હરેશ રોહિત નામના યુવકે વિશ્વાસમાં લીધી હતી. હરેશે યુવતીને ટેબલેટ અપાવવાનું બહાનું બતાવી આણંદ લઈ જઈ તેના ડોક્યુમેન્ટ્સ મેળવ્યા હતા અને વિવિધ કાગળો પર સહીઓ કરાવી લીધી હતી.
યુવતી જ્યારે પોતાના કોમ્પ્યુટર ક્લાસીસમાં વ્યસ્ત હતી, ત્યારે તેની જાણ બહાર આ દસ્તાવેજોનો દુરુપયોગ કરી લગ્ન નોંધણી કરાવી દેવામાં આવી હતી.
ધુણાદરા ગ્રામ પંચાયતમાં બોગસ મેરેજ સર્ટિફિકેટ?
આશ્ચર્યની વાત એ છે કે, આ લગ્ન 30 જાન્યુઆરી 2025 ના રોજ ધુણાદરા ગ્રામ પંચાયતમાં નોંધવામાં આવ્યા હતા. યુવતીના ચોંકાવનારા આક્ષેપો મુજબ:
તે ક્યારેય ધુણાદરા ગ્રામ પંચાયતમાં ગઈ નથી.
કોઈ મંદિરમાં ફેરા ફર્યા નથી કે કોઈ પૂજારીને મળી નથી.
લગ્ન નોંધણીમાં સાક્ષી તરીકે સહી કરનારાઓને પણ તે ઓળખતી નથી.
યુવતીને આ છેતરપિંડીની જાણ છેક 6 મહિના પછી થઈ જ્યારે હરેશે તેને મેરેજ સર્ટિફિકેટ બતાવી તેની સાથે રહેવા આવવા દબાણ કર્યું હતું.
ભાઈને મારી નાખવાની ધમકી અને સામાજિક મુશ્કેલી
બુટલેગર જેવી માનસિકતા ધરાવતા હરેશે યુવતીને ધમકી આપી છે કે જો તે તેની સાથે નહીં આવે, તો તેના એકમાત્ર ભાઈને તેના માણસો દ્વારા મારી નંખાવશે. આ બોગસ લગ્નને કારણે યુવતી અને તેનો પરિવાર ભારે માનસિક અને સામાજિક તણાવમાં છે. છેલ્લા 6-7 મહિનાથી આ યુવતી કાયદાકીય ન્યાય મેળવવા લડત આપી રહી છે.
ન્યાયની માંગ અને SPG ની એન્ટ્રી
આ ગંભીર મામલે હવે એસપીજી (SPG) ની ટીમ પણ મેદાને આવી છે. ટીમ દ્વારા આ મામલે તટસ્થ તપાસ કરી જવાબદાર તલાટીઓ, વકીલો અને સાક્ષીઓ સામે કડક કાર્યવાહી કરવાની માંગ કરવામાં આવી છે. યુવતીના પરિવારે સરકાર પાસે ન્યાયની ગુહાર લગાવી છે અને ભવિષ્યમાં આવા બોગસ લગ્ન અટકાવવા માટે કાયદામાં કડક સુધારો કરવાની માંગ કરી છે.
