રાજકોટ સહિત સૌરાષ્ટ્ર-કચ્છમાં ભર શિયાળે કમોસમી વરસાદ: વર્ષ ૨૦૨૫ના અંતિમ દિવસે મેઘરાજાની એન્ટ્રીથી ખેડૂતો ચિંતાતુર
ગુજરાત: વર્ષ ૨૦૨૫ના અંતિમ દિવસે જ્યારે લોકો નવા વર્ષની ઉજવણીની તૈયારી કરી રહ્યા છે, ત્યારે ગુજરાતમાં કુદરતની આફત ત્રાટકી છે. રાજ્યના અનેક જિલ્લાઓમાં વાતાવરણમાં અચાનક પલટો આવતા કમોસમી વરસાદ નોંધાયો છે. હવામાન વિભાગે આગામી ૨ જાન્યુઆરી સુધી વરસાદી માહોલ યથાવત્ રહેવાની આગાહી કરી છે.
સૌરાષ્ટ્ર અને કચ્છના વાતાવરણમાં પલટો
વહેલી સવારથી જ સૌરાષ્ટ્રના દરિયાકાંઠાના વિસ્તારોમાં વાદળછાયું વાતાવરણ જોવા મળ્યું હતું. પોરબંદર અને દેવભૂમિ દ્વારકા જિલ્લાના ગ્રામ્ય વિસ્તારોમાં ધીમી ધારે વરસાદ શરૂ થતા જનજીવન પ્રભાવિત થયું છે. કમોસમી વરસાદના કારણે વાતાવરણમાં એકાએક ઠંડક પ્રસરી ગઈ છે.
જિલ્લાવાર વરસાદની સ્થિતિ:
રાજકોટ: પડધરી તાલુકાના જીવાપર, વિસામણ, પીઠડીયા, ખાખરા સહિતના ગ્રામ્ય પંથકમાં વરસાદી ઝાપટાં પડ્યા છે.
જામનગર: ચેલા-ચાંગા અને આસપાસના વિસ્તારોમાં હળવાથી મધ્યમ વરસાદ નોંધાયો છે.
દેવભૂમિ દ્વારકા: કલ્યાણપુર અને જામખંભાળિયામાં ઝરમર વરસાદથી રસ્તાઓ ભીના થયા છે.
પોરબંદર: શહેર અને ગ્રામ્ય પંથકમાં કાળા ડિબાંગ વાદળો વચ્ચે વરસાદી માહોલ છવાયો છે.
ખેતી પર સંકટ: જીરું અને ઘઉંના પાકને નુકસાનની ભીતિ
ભર શિયાળે પડેલા આ વરસાદે જગતના તાતની ચિંતામાં વધારો કર્યો છે. હાલમાં રવિ પાક (શિયાળુ પાક) તૈયાર થવાની કે મહત્વની અવસ્થામાં છે.
નુકસાનની આશંકા: ખાસ કરીને જીરું, ચણા, ધાણા અને ઘઉં જેવા પાકોમાં ફૂગ લાગવાની કે પાક બળી જવાની શક્યતા છે.
માર્કેટિંગ યાર્ડમાં એલર્ટ: માર્કેટિંગ યાર્ડોમાં પડેલી ખેડૂતોની ઉપજ ભીંજાય નહીં તે માટે સત્તાધીશો દ્વારા તાત્કાલિક શેડ નીચે માલ ખસેડવા સૂચના આપવામાં આવી છે.
શા માટે પડ્યો વરસાદ?
હવામાન વિભાગના જણાવ્યા અનુસાર, વેસ્ટર્ન ડિસ્ટર્બન્સ સક્રિય થવાને કારણે ઉત્તર ગુજરાત, સૌરાષ્ટ્ર અને કચ્છના વિસ્તારોમાં વરસાદી માહોલ સર્જાયો છે. આગામી ૪૮ કલાક સુધી રાજ્યમાં માવઠાની અસર જોવા મળી શકે છે.
